Nɛbi 'a "kpei -tedɛ -nɩa 'de -ta -kwɛa i
24
Nyɔsoa wluɛ 'de Moisɩ ‑pee ka ɛ 'na: 2 ‑Ɩn -tmʋʋ' Israɛ -nyʋ ʋʋ 'je -ʋn olifʋa 'a 'cna ‑nmɔai" ‑flɛn" sea ‑pʋn" nɩ ja-, ‑wɛe nɛbi 'je wan 'de nɔ" "oo nɔ" ‑wee' 'di. 3 Aarɔn -teɛ nɛbi -nɩ 'de tae' fɔ ‑ɛ ‑kaan kɛ' ‑gbau' "i 'de ‑tan 'tan ‑ɛ ‑sɔn nyʋ ke Kea a -gbʋʋan "juɛi ɛ, ‑wɛe ɩ 'je wan 'de Nyɔsoa "juɛi 'de nɔ" "oo nɔ" ‑wee' 'di. Ɛ nɩɛ kɛ' ‑o ao ke aoa' "ji 'a "ji 'je wɔn 'je. 4 Nɛbi 'a bʋ nyʋ nʋʋa "sani ‑kwɛai 'pepe 'ʋn ɛ, ɛmɛ ‑ɛɛ "kpei ɔɔ mu nɛbi ‑nɩ ‑tea' ‑wɛe ɩ 'je wan 'de 'ʋn "juɛi nɔ" "oo "nɔ ‑wee' 'di.5 Nyɔsoa wluɛ 'de Moisɩ ‑pee ka ɛ 'na: ‑Ma muɛ faipʋ "pɩɔɔn pɩɔɔn 'ʋn "dua' ‑wɛe ‑ɩn ‑je kato' ‑puue 'jɔ 'sɔɔn ‑ɛɛ due' 'blea "cio ‑mɛɛo" nʋ. 6 ‑Ma muɛ ‑mɛɛo" ‑mɛɛo" kpɔ 'sɔɔn ‑tea' 'de kwlukpa nyʋ nʋa "sani ‑kweai 'pepe 'ʋn "kpei 'de Nyɔsoa "juɛi. 7 ‑Ma muɛ ɩa' ‑sro paifɛn' 'dɔe jai -gbaa' due due' ‑wɛe nyʋ 'jɩ "jri po 'de dipɛn 'ɛ -kɔ "i 'de Nyɔsoa "juɛi ‑wɛe ɛ 'je "jriɛ o siedɛ nɩ-.
8 Saba "oo saba 'a wɩ o ɛ, nyɔ ɔ mua ɩa' kato' tu i ‑tea' 'de Nyɔsoa "juɛi ‑wɛe ɩ 'je 'e nɩ 'de nɔ" "oo "nɔ ‑wee' 'di. Ɛ nɩɛ dbɛɛdɛ ‑o, Israɛ -nyʋ 'je i kpʋn 'de nɔ" "oo "nɔ ‑wee' 'di. 9 Ɩ nɩɛ Aarɔn ke ɔɔ' "nynuu 'a dina' ‑o ‑wɛe ʋʋ 'jɩ di 'de ‑ta ‑kwɛai ɛ, dɛ dɛ‑nʋɛ' mɛ ‑nɩ ɩ ‑kwɛ i 'pepe, ɩ 'wlʋɛ 'e 'sraa ɛ ‑wee' nɛ dia -ɛ -tea Nyɔsoa 'a -tea "kpei. Ɛ nɩɛ kɛ' ‑o nyʋ 'je wɔn 'je 'de nɔ" "oo "nɔ ‑wee' 'di.
10 'Wɩ jrɛ' 'di 'sʋ Israɛ 'nynɔ due' 'a "ju ʋ ke Esipʋ ‑i 'wlʋa ɔmɔ ‑ji 'de Israɛ -nyʋ ‑kwea ‑wɛe ‑ɔ ke Israɛ ‑i due' ‑saʋn'. 11 Israɛ 'nynɔ ɔ' "ju ‑nɔ ɔmɔ ‑blaa Kea 'a 'nynɩ wɔn i ‑wɛe ‑ɔ -poɛ ‑soo' o. 'Sʋ ʋʋ jɔ 'de Moisɩ "juɛi. Ɔ de 'a 'nynɩ ‑nɩ Selomitɩ, ʋ nɩɛ Dibri 'a "ju ‑o 'de Dan 'a "ji 'di. 12 Ʋʋ ‑teɔ' 'e ‑ta nyʋ 'bɛɛa nyʋ 'jeɔ "jriɛ o sie ka ‑cɔɔn'‑ ka 'de ɛ 'je 'kan nɩ 'de ʋʋ 'je dɛ Nyɔsoa 'jea 'tmʋ 'de ɔɔ' ‑tɩ' 'ʋn 'fʋo-.
13 'Sʋ Nyɔsoa wluɛ 'de Moisɩ ‑pee ka ɛ 'na: 14 Ao ‑sa nyɔ -ɔ blaa Kea wɔin 'mʋʋa- 'de ‑ta aoa ‑kwlea, nyʋ "klein ‑ʋʋ ‑wɔan ɔɔ' wlu ʋʋa muɔ kwa "jru ‑tea', 'de ɛ -mɛ 'de ɛ, Israɛ -nyʋ ‑wee' a muɔ "soi itbaa' ʋʋ 'jeɔ 'dba.
15 ‑Ɩn -tmʋʋ' Israɛ -nyʋ ka ‑ɩn ‑na: Nyɔ "oo nyɔ ‑ɔɔ mua Kea ‑soo' o pooa' ɔɔ dɛsaʋn 'a ‑kao 'a muɛ ɔɔ' ‑cɛ" "kpei jia'. 16 Nyɔ ‑ɔɔ mua Kea wɔin blaa' ‑mɛ 'mɛɛa mɛ ‑nɩ ɛɛ' ‑kao, nyʋ ‑wee' "klein a muɔ "soi i tbaa'. ‑Bo ɔ nɩ 'dʋɩ 'dewlɛ Israɛ -i 'a ‑cɛ" 'kpa, ɔɔ muɛ 'mɛɛa, dɛ dɛ‑nʋɛ' ɔ blaa Nyɔsoa 'a 'nynɩ ‑kwɛai wɔn i.
17 Nyɔ ‑ɔɔ mua ɔɔ' ‑ponyiɔ 'dbaa ɛɛ' ‑kao mɛ ‑nɩ nyʋ 'jeɔ 'dba. 18 ‑Bo ɔ 'dba ɔɔ' ‑podɛi" 'a "nɔdɛ- ɛ, ɔ 'jeɛ ‑kɔo poo‑, 'kmʋ 'de 'kmʋ ‑kɔo.
19 ‑Bo nyɔ jrɔ' pooa ɔɔ' ‑ponyiɔ ɛ, ka ɔ nʋa 'mʋʋa‑ 'ka ʋʋ 'jeɔ "jri i nʋʋ‑ ‑ke: 20 ‑craa' "sii ɛ -craa' ‑kɔo, "jri 'de "jri ‑kɔo, 'nynɩ 'de 'nynɩ ‑kɔo, ka ɔ nʋa ɔɔ' ‑ponyiɔ pooa sʋn 'ka nyʋ 'jeɔ ɔmɔ pooa ‑ke.
21 Ɛmɛ ‑ɛɛ ‑tɩ' ɛ, nyɔ ‑ɔɔ mua "nɔdɛ- 'dbaa a, ɔɔ muɛ ‑kɔo pooa', ‑wɛe nyɔ ‑ɔɔ mua nyʋ 'dbaa nyɔ ɔ muɔ 'dbaa.
22 Kɛ' due' ‑nɩ mɩ ‑nɩ 'dʋɩ ke Israɛ ‑kɔʋn 'a ‑cɛ" 'ɛ ‑tɩ' 'ʋn, dɛ dɛ‑nʋɛ' 'mɔ ‑nɩ Nyɔsoa, aoa' Kea.
23 Ɩ mɩ Moisɩ 'tmʋ 'de Israɛ -nyʋ ‑pee, ‑wɛe ʋʋ ‑sa "ju ‑blaa Kea 'a wlu wɔin ‑nɔ 'de ʋʋpʋ‑ "klu ‑wɛe ʋʋ nʋ "soi 'a 'sʋsʋ ʋʋ 'dbɔ ɔ. Dɛ Nyɔsoa "sia nynɩ 'de Moisɩ -pee ɛ ɛmɛ ʋʋpʋ nʋ.